Do Eaki sa Sueod it Barko

uman nga ginsugid ni Darwin Tapayan

May sangka eaki nga nagtipon it kwarta sa mabuhay nga paniempo agud to makasakay sa cruise ship ag malibot ro Eawod Mediteranyan. Pag-abot sa barko, masadya imaw nga ginsubeang it sangka crew ku barko ag to ginbuoe ro anang daywa ka maeagku nga maleta. Gindaea raya it crew sa anang cabin ag to hapilitan imaw nga taw-an it kwarta ro crew. Indi imaw kapati nga nakasampa gid imaw sa cruise ship, sangka butang nga mabuhay na' eon nga handom. Insigida raya nga naghilata sa eugban. Dayon ginpambuksan na' ro daywa ka maleta. Do sueod it sambilog hay puro ieislan ag do sa pihak hay eaban pagkaon kamana it nodols, de lata, mga biskwit, ag iba pa nga mga kapareho nga pagkaon.

Nagpabilin ro eaki sa sueod it cabin samtang ginapamantaw ro mga masinadya nga lugar halin sa bintana kara. Haagyan na' nga magtapak sa Roma apang owa gid magmunot nga magwarang. Mabuhay eon nga handom ku rayang magueang nga eaki nga makit-an ag makatuntong sa Roma. Nagmantener imaw sa cabin ag magkinaon ku daea nga mga pagkaon sa sueod sa isip nga makatipid.

Naibot raya nga makit-an ro mga kaibahan sa barko nga nagaadto sa mga sine, nagapamantaw ku mga paguwa, pagkinasadya ag nagakaon ku mga masinadya nga pagkaon. Owa man raya nagapaeaba ag nagmantener nga mageaba ku anang mga panuksok sa sueod it cabin ay sangkiri malang ro anang daea.

Halin sa anang kuwarto, hapamantaw na' ro mga eain-eain nga mga masinadya nga lugar ugaling owa gid nagwarang sa mga raya sa isip nga magastos. Mawron nga nakontento eon lang imaw isaea sa sueod it cabin.

Sa ulihi nga adlaw sayod ku eaki ro matabo nga binayle, mawto nga ginpaguwa na' ro anang pinakamasadya nga eambong pansaot sa pinakaulihi nga gabii it pagtener nanda sa barko. Apang nagdesisyon nga di eon mag-entra matapos to nga masyran nga aeang-aeang ro badyet. Maangan-angan, pilang oras bag-o ro pagkinasadya, nag-abot ro crew sa anang kuwarto. Nangutana ro crew kon alin sa mga aktibidad sa barko ro gusto na' atendaran. Ginpaeubot ku crew nga libre ro mga raya. Nakibot ro eaki ag habuy-an ro de lata nga buyot samtang nagakaon ku sueod kara. Natagbueo ro crew sa nangin reaksiyon ku eaki. Ginsugid pa kara nga tanan nga aktibidad sa barko umpisa kat nagsampa raya hay libre kamana it sine, paguwa, binayle, pagwarang sa mga lugar, masinadya nga mga pagkaon, pagpaeaba, tanan hay kaibahan sa ticket nga nabayran.

Tuon sa kabuhi: tanan nga kahigayunan hay ginsalig ag gintao katon it Diyos para sa aton nga pag-umead ag kasadyahan. Do pagsalig ag komunikasyon Kana ro paagi sa paghisayod ku aton nga mga ikasarang ag mga kahigayunan.