PROBINSYANO

binaeaybay ni Darwin Tapayan

Handom ko’y magpasimpaead sa ibang eugta

Nga dayang handom ko’y mapaidto sa Maynila

Agud nga kalisdanan sa probinsya’y aywan

Apang sa gihapo’ magaulikid sa banwang kinabugtawan.

Sa probinsiya’y mahipos, ag do tawo hay nagahieibaot

Sa siyudad hay masangag, ag masaku ro palibot.

Kung daya man nga panamgo hay matabo

Ako hay magabalik sa Akean—probinsiya ko.

Kung ako ma’y mapaidto, ‘di ko pagkalipatan maliway nga uma

Do bukid, do eanas, ag do matin-aw nga suba

Do handaan kung may pista sa barangay,

Ngani man, di ko gid pagkalipatan si Nanay ag Tatay.

Ipabugae ko nga ako hay probinsiyano, sa panghueag, panghambae

Nganing ginakilaea ko rayang kultura ag tradisyon agud ikapabugae.

Siin man ako daehon it hanging mabaskog

Ako sa kamatuoran, itaas ro pagkaprobinsiyano, do pagkamatuod.

Ag kung daya man nga mga ibanhon hay mapaiya sa Akean

Sigurado nga ipakita ko ro manggad nga kato’y handumanan

Ku mga katigueangan, sa tradisyong masadaya, manami

Dayang mabaskog nga pagtuo, sa makulay nga ati-ati.

Daya man nga paghinambaean hay ipabugae, pakahaeungan

Agud sa pagdayon it paniempo hay indi maduea san-o paman

Ag do dayang bugna it eangit hay ipabugae, ipakilaea

Sa mga dumueong hay ipabugae, agud raya’y mangin kadaeag-an ta.

Ako hay probinsiyanong matuod, sa hueag, sa hambae, sa huna

Ako hay hantop nga Akeanon, ginapabugae ag indi ikahuya

Mapasaibang eugta man, sa probinsiya ko ako hay mahidlaw

Magabalik ag magaulikid daea ro kadaeag-an sa indi magbuhay.