Pagsueat:Daean sa Kadaeag-an

ni Darwin Tapayan

Pagsueat, imaw ro ikasarang nga gintao kakon it mahae nga Makaako nga gintaw-an ko it tuman nga paghaeong ag pagpanipueos. Sa pagsueat, nabugtaw ako sa kanami it kabuhi, sa kasadya it panamgo, ag sa hugot nga pagtuo. Nahisayuran ko makaron nga ro pagsueat hay isaea ka daean sa kadaeag-an.

Photo courtesy of Google Search

Pagsueat—daya ro tawag it akong kabuhi. Nakilaea ko ro akon kaugalingon sa rayang akong pamatan-on bilang isaea ka eab-as (bag-ong subat) nga manunueat. Isaea ako ka manugsaysay ag manunula. Do raya nga kahigayunan hay nagpabaskog ku akon nga buot agud maghimu it panamgo sa dueot it bolpen nga nagatao it kapuseanan sa papel. Do pagsueat ro nagtueod kakon nga magbinag-binag sa kabuhi. Daya ro akon nga nangin abyan sa kahimtangan nga ako hay masubo, nga ako hay ina sa tuman nga pagsamit ag pagpangalisod sa kabuhi, ag imaw ro akon nga kabaskog kung haeos ro tanan nga tawo hay ginakaugtan ako.

Papel ag bolpen ro akon nga aeagtunan sa tiempo it tuman nga pagpangabudlay. Sa agi it bolpen, naisalaysay rayang tanhaga nga nagaeumon sa umilig nga euha ag dayang kaugot nga sa tagipusuo’y nageubong. Dayang akong panan-awan, panamgo, kabuhi, ag kaaeam hay gintaw-an it kabuhi it ahaw papel ag bolpen.

Mabahoe ro akon nga kalipay nga may abyan akong nagasaysay it akong euha, dugo, ag hueas. Do abyan nga nagabaton ag owa nagapangipoe sa kaabong kalisod nga sa kana’y ginasaysay—imaw rong papel. Ag sayod kong ro mga anghel hay sanda ro nagaguyod ku akong alima agud nga magsueat. Ginapasaeamatan ku it tuman rong Diyos sa raya nga mabinut-anong bugay.

Sa pagsueat nakilaea ko ro akong kaugalingon. Sa pagsueat, natuon ro akong kaugalingon sa pagbinag-binag, ag sa kada kataga nga akong ginasueat hay natukiban kong nagapanaeamin sa akong kabuhi. Ako gali ro tawo it paghimakas. Nga sa pihak it mga kalisadanan sa kabuhi hay nagapabilin ako nga mabaskog. Nagahimakas ako agud maabot ko ro akong handom. Makaron ko nahisayuran nga ro pagsueat hay daean sa kadaeag-an.