'Ay manong driver, pagdahan man!'

Sangka panan-awan (news analysis) ni Darwin T. Tapayan

Ginakabuligan it rescue team ro sangka 55-anyos nga eaki matapos nga habungguan it nagahagunos nga van sa Brgy. Bulwang, Numancia. Imaw ra sambilog sa tatlo nga napatay sa sueod it sang-dominggo bangud sa paspas nga padaeagan it iba nga mga saeakyan.

Ku nagtaliwan ng dominggo, ‘baw tatlo gid ro patay matapos nga masaeawig ukon mabanggaan it nagahagunos nga mga saeakyan iya sa probinsya it Akean!

Patay gid ro 40-anyos nga maestra nga si Eden Benitez, daywang adlaw matapos nga masaeawig it kasunod nga armored van ro ginamaneho kara nga motorsiklo sa Brgy. Linabuan Sur, Banga. Natabu ra agahon ku nagtaliwan nga Oktubre 26, Miyerkules nga adlaw. Bangud sa madasig ro padaeagan it armored van, inapok gid ro makeueuoy nga manugturo sa sementado nga karsadahon ag nabasag gid ro ana nga helmet. Malala gid ro lastro nga naangkon na sa ueo euwas pa sa mga nina nana sa nagkaeain-eain nga parte ku anang eawas. Kanugon, ay bangud eang sa haras-haras ag padasae nga pagmaneho, do sang ka mabuot ag nagapanerbisyo sa mga inunga nga maestro hay napatay gid.

Sa kamatuoran, dapat hay nagaminor t-a sa pagbiyahe ro mga seakyan ngara kung nagapaeangop sanda sa mga eskuwelahan, pero sa punto ngara mangku siga gid ro driver it armored van ay eaom na’ siguro nga ana ro daean.

Patay man ro sang ka 55-anyos kara nga eaki matapos to nga mabanggaan man it nagahagunos nga pampasaherong van sa Bulwang, Numancia, gapasalikaeom ro takna ku Biyernes. Gindaea pa ra imaw sa baeay-bueoengan, apang makapilang ginutlo hay ginbawian man it hueam na' nga kinabuhi. Gatabok man lang man kuno ra sa karsada.

Pagkaaga kara, Sabado, mga ala-sais man it gabii ro pang-urason tag masaeawig man it nagahagunos nga taxi ro sangka motorsiklo nga ginamaneho ni Ricardo Meñez, 34-anyos, sa Brgy. Ondoy, Ibajay. Hautod gid ngani ro anang natuo nga batiis bangud sa kabaskug it pagkabunggo. Eanog gid ro mabahoe nga parte ku anang eawas rason nga ‘wa gid maw kaabot it buhi sa district hospital it Ibajay.

Bisan pa nga naaresto ro mga responsable sa likod it raya nga mga aksidente, do kabuhi nga nausik hay indi eon maibalik pa, ag mabahoe gid nga kawad-an kapin pa kon sanda hay ginasaligan it pamilya ag bisan pa it kumonidad. Do pangutana, may mga layi baea kita nga nagalimita sa mga paspas magpadaeagan ngara nga mga driver? Ag kon may una, ham-an mangku owa t-a it tikang nga ginapatikasog ro lokal nga gobyerno kara? Pila pa ka aksidente ro hueaton naton? Pila pa ka kabuhi ro dapat nga mausik bag-o maghueag ro lokal nga gobyerno angot kara?

Bangud baea sa nageapad nga karsadahon it probinsiya hay nangin kampante ro iba nga mga driver nga magpinadasig it daeagan ku andang mga saeakyan? Do problema, ikaw nga manugtabok o ahaw nagabaktas, ukon motorista, hay bisan ano it dahan, owa man gihapon it pueos kon ro iba hay owa gid man it disiplina kapin pa kon nagabyahe nga hilong.

Abaw manong driver pagdahan man!