DO BUGAY IT KAAEAM

Ginsalin ni D. Tapayan halin sa Hueubaton bahin ikaywa it Lumang Kasugtanan it Balaan nga Bibliya.Do "Tueun-an it mga Hueubaton" hay katipunan it maabong paeaanggiran, kahambaean, ag tula, do pila sa mga raya hay ginsueat ni Solomon.

1.Akong 'angga, do mga hambae ko hay pamatian mo,

Ag do akong mga sugo, hueangan gid ag sundon mo.

2. Do pamati mo'y ituon sa matarong nga kaaeam

Ag daya hay isipon agud imong mahangpan.

3. Paghimakasan mong usuyon ro matuod nga kaaeam,

Pagkahisayod hay piliton mong makita'g masapuan.

4-5. Kung raya hay mingko pilak nga imong pagausuyon

Ag kaparas it bueawan nga imong pagadueangon,

Sa Ginuo hay makaangkon ka it balaan nga kahadlok

Ag mangin imo ro paghangop nahanungod sa atong Diyos.

6-7. Imaw ro nagabugay it kaaeam

Sa bibig nana, nagabusawak ro paghangop ag kaaeam,

Pagataw-an nana it paghangop ro matadlong nga pagpangabuhi,

Ag do tawong matarong hay indi na' pag-iwaksi.

8. Ginabantayan nana ro daean it pagkamatarong

Ag do eak-ang it alagad na'y pakatan-awon.

9. Ngani nga, imong mahisayuran katadlong ag pagkamatarong

Ag imong pagatuytuyon ro daean it pagkabalaanon.

10. Magaeapnaag ro kaaeam nga sa isip hay maitanom,

Mabatyaga'y kalipay nga bugay it rayang kaaeamon.

11. Do nabatong kaaeam kimo hay magasihaeong.

Do paghangop hay magataeang sa liku-likong daeanon.

12-13. Igaeayo ka nana sa maeaing pagpangabuhi,

Ag idto sa mga tawong ro gusto hay kaguluhang grabe,

Igaeayo ka it raya sa mga bugaeon,

Nga ro daean nga gusto hay daean it kadueom.

14. Mga tawong ro gusto hay paghimu it kaeainan;

Do andang kalipaya'y magulong pangabuhianan.

15. Sa ugaling buyot nanda'y 'di sanda mangapuslan,

Sanda hay bukon it matarong, indi mangasaligan.

16. Maieayo ka sa babaying ueagan,

Ag sa anang pang-ueag hay indi ka mabihag.

17. Imaw ro babaying nagalikaw sa mayad nga tuon,

Nagatalikod sa asawa nana, nagsamad it kasugtanang dayon.

18. Ngani nga ro daean nana'y paagto sa kamatayon,

Ag do anang kabuhi hay paagto sa kasamaran.

19. Sin-umang madaea nana hay dayunong magaanod,

Ag indi eon makabalik sa pangabuhing maayos.

20. Ngani nga, tuytuyon mo ro daean it mga matadlong

Indi raya paglikawan hastang ro ginhawa'y mautod.

21. Bangod do maboot nga tawo'y magabuhay sa kalibutan,

Do may kabuhi nga matarong hay indi mapataeang.

22. Apang do maeain sa eugta'y mangaduea,

Pagabunuton pati ugat it tanan nga manugdaya.

***************

Padumdom: Daya hay bukon it opisyal nga pageubad sa rayang bahin it Bibliya ag owa ginaindorso it anuman nga Kristiyanong relihiyon ukon organisasyon. Kung may kasaepanan, daya hay bilog nga pagasabton it daya nga manugsueat. Do katuyuan kara hay purong may kabangdanan sa pagbinaeaybay ag paghinambaean eamang.