Ambahanon ni Solomon

Do Unang Ambahanon

Ginsalin pa-Akeanon ni Darwin Tapayan

Do tueun-an nga “Ambahanon ni Solomon” sa luma nga kasugtananit Bibliya hay katipunan nit mga tula it paghigugma. Para sa mga Kristiyano, daya’y paeanginawan it paghiusa ni Kristo ag it Iglesya.

Babayi:

Ako ngara’y gindum-ok, ginhaeusan it haru;

Owa it kaintam-is ro daea nga paghigugma nimo.

Do daea mong kahumot siin baea ipaparas?

Kasinhumot it pangaean mong ro hugom hay nagapamaeaktas.

Ngani tanan nga daeaga hay imo nganing nangadangat.

Ako makaron hay iya, daehon sa siin ag bisan,

Ag ako hay imong daehon sa doog mong pahueuwayan.

Pat-od akong magamalipayon makarong ikaw hay iya,

Do gusto ko hay mabatyagan ro dabdab it imong paghigugma;

Paghigugma mo’y masgusto ko, bisan sa alinmang ieimnon;

Owa ako nagkasaea nga ikaw hay higugmaon.

Daeaga it Jerusalem, kulay eapok ako,

Kaangay ko ma’y mga butang it hari sa palasyo

Indi ako pagtumuon bangod eang sa akong kulay,

Bangod rayang akong panit hay nasunog eamang sa adlaw.

Dayang mga igmanghod ko’y owa ako ginakahamut-an.

Nagahiusa sandang aklo’y pabantayon it kaubusan

Pinausbong ag tinatap ko ro nasambit nga patanuman,

Anupang ro kaugalingon hay tuman kong napabay-an.

Dayang akong palihog, O hinigugma kong ginahigugma,

Sa akon hambaeon mo nahamtangan it mga kasapatang alaga,

Siin sanda gindaea? Siin do andang pahueuwayan

Kakon hay ituro mo agod ako hay indi magtaeang.

Manughigugma:

Kung hinusto mo nga mahisayuran, O babaying tuman katahom,

Do dapat eang hay himuon mong ro kordero’y sundon.

Do sinakpan it kanding hay idto mo padagsaon

Sa binit it tolda it pastol it kasapatan nakon.

Siin ko baea ipaparas ro eumay mo akong husto?

Anong katahom kung matan-aw kabayo it Farao?

Mga uyahong mahinumok, may gahom, may eumay,

Nga hinusto pang pinatahom ro palawit nga mainangay.

Do hinurma nga leog mo tan-awon ko’y anong dikit

Tuman pa nga kung may kulintas nga idto nakasab-it.

Ikaw’y among pagahimuan it kulintas nga mabinueawan,

Pampatahom nga igasab-it hay pilak nga hinusay.

Babayi:

Samtang imaw hay nakahilata, mingko hari nga angayan,

Ako man hay magasab-og it mahumot nga mahug’man.

Do kahumot it akong hinigugma hay kaparas it rayang mira,

Samatang sa dughan ko’y nakaeubog nga masadya.

Do kaangay it hinigugma ko’y isaeang punpon it bueak

Sa ubusan it En-gadi, mahusto kong pinamuk-as.

Eaki:

Matahom ka akong hinigugma, do mata mo’y maeapungay,

Nagakieintab, nagapandagit samtang akong matan-aw.

Babayi:

Makusog ka akong hinigugma, anong kusog, anong angay,

Do mangin pahueuwayan nato’y perming kulay nga kaeab-asan

Ag sedro ro nhakop it rayang pagapamaeayan

Mga kilo’y pinong pili, kahoy man nga angayan.

Isaea eamang akong rosas nga sa Saron nagtaeang

Sa likwang it rayang bukid, isaea ka tanom nga nagtaeang.

Eaki:

Kaparas mo’y isaeang liryo sa tunga it kagueangan,

Pinasahi ka sa tanan, pinasahi, ikaw akong angayan.

Babayi:

Sa tunga it kagueangan kapara na’ hay mansanas,

Sa tanan nga mga tawo, imaw hay owa it kaparas;

Ako’y perming nagakahidlaw sa handing na’y magpahuway,

Do tam-is it bunga nana kung samitan ko’y anong nanam.

Tag ako’y anang daehon sa bugana na nga hapag.

Sa euyo na’y nabatyagan ko ro paghigugman nang dapat.

Ako’y anang pinakaon it eab-as nga ubas

Ag matam-is nga binusog it mananam nga mansanas

Ag do uhaw it tagipusuon  hay nakasapupo it pagpanas.

Do waea na’ng butkon hay imaw kong ginaeugban,

Samatang ako’y ginahikap it tuo na nga alimang tuman.

Ipinagda n’yo kakon, daeaga sa Jerusalem nga gid,

Sa ngaean it mga usa’g mga sapat nga madinasig,

Do among paghigugmaan hay indi nyo pag-isugid.

-Setyembre 10, 2008