‘Multiple entry, multiple exit’ – Kaeuoy man ro Boracay!

news analysis ni Darwin Tapayan

‘Multiple entry, multiple exit’ raya ro nagaguwa makaron sa sikat nga isla it Boracay butang nga mabahoe nga paeag raya sa seguridad it mga bisita ag mga pumueuyo riya.

Gin-aku ni Niven Maquirang, Caticlan jetty port administrator, sa ginpatigayun nga paghilibati (hearing) sa Sangguniang Panlalawigan nga owa napapatuman ro ‘one entry, one exit policy’ it probinsiya.

Euwas abi sa main entry ag exit point nga Caticlan jetty port ag Cagban port sa isla, may an-om pa gali ka welcome center it mga resort nga naga-operate man sa mainland Malay nga ginagamit mang entry ag exit point it iba nga mga bisita. Do makahawag-hawag hay wa gid nagaagi sa security check ro mga bisita ngara ag mga bagahe nanda.

Do Shangrila sa brgy. Yapak, Boracay hay may kaugalingon ta nga port; do mga baruto nga nagahalin sa Hambil, Romblon nagadungka man sa station 1 sa Boracay; indi man maitago nga ro back portion it isla eabi eon gid sa Bulabog beach ag bisan sa may Puka beach hay ginadungkaan man it mga baruto ag bisan kargo. Problema kara ‘wa man gali it may nagacheck sa mga karga kara.

Kon mawra ro sistema runa sa isla, pagusto lang man ro mga oportunista ngara, hay sigurado indi mag-eayu nga masueod gid it terorista ro Boracay. Sa kamatuoran, ro mga maeain nga elemento hay una eon man kamana it mga drug addict, mga manakaw, ag iba pa nga mga kriminal.

Makaron, mainit gid ro mga terorista ag kaaway it gobyerno. Ku kan-o eang gin-engkwentro it mga bandidong grupo ro mga suldado sa Bohol ag ginsundan it pagsabog sa Quiapo. Sin-o ro indi magkahawag sa nagakatabu ngara?

Do akon nga nadismayahan hay may pagbag-o nga ginaduso si Maquirang sa provincial ordinance 05-032 o mas kilaea sa “one entry, one exit” ordinance nga gin-aprubahan ku dag-on 2005 pa. Disgusto ako sa gusto na’ nga matabu ay naggaguwa nga nagapabor daya sa mga oportunista. 

Gusto na abi nga matabu, imbes dueaon do raya nga mga welcome center, ay pasugtan lang ag butangan pa it mga coastguard ag pulis ridto butang nga ginakueang eon ngani ro mga personnel ngara. Butangan lang kuno it mga x-ray machine ro mga welcome center ngara.

Do indi ko gid maisip it husto ham-an gusto nga magtukod it Yapak Jetty Port ag Passenger Terminal sa Yapak, Boracay. Salikwaot gid raya nga mayad sa husto nga pagpatuman it ginatawag nga ‘one entry, one exit policy’ para kuno mabawasan ro paggutok it mga pasahero sa Cagban port una man sa Boracay.

Do akon manlang kara hay i-centralize do mga dueungkaan una. Tanan nga welcome center ibutang sa sangka lugar eang. Do mga cargoe vessel ngara hay siguraduhon gid nga ginacheck ro mga karga. 

Wow! Bilyon ro ginakita ngara ku isla it Boracay. Do mabahoe nga ginaganar it Akean halin gid sa rayang dunang manggad. Tanan ra pwede maduea sa sang pisok eang kon indi ra eagi matatapan it gobyerno. Kabay nga sa pagiging matinuohon ku mga Akeanon, do ginakahadlukan nga pagsabog o kidnapping hay indi gid matabu sa Boracay.

Agubayan ag bendisyunan kita it Mahae nga Makaako!