Do Lenti ag si Rowena

base sa matuod nga natabu

panaysayon ni Darwin Tapayan

Sa isaea ka tagaepon ukon bukid sa Tangalan, Aklan, may mag-asawa nga nagahingaean kanday Mila ag Rude. Do mag-asawa hay nagapanag-iya it may kaeaparon nga eugta ina man mismo sa andang lugar. Pobre manlang ro mag-asawa ugaling nagahimakas man t-a sanda nga mapatapos ro pagtuon ku andang kamanghuran nga ina kanda napabilin.

Do mga magueang ni Rowena hay nagapanginsarili eon it pagpangabuhi kaibahan ro anda nga mga asawa ag eaban idto sa Maynila. Sa dikara, hayskul paeang si Rowena, nagapangidaron imaw it katorse anyos ag nagatuon bilang tirdyer. Nagasakay imaw it traysikol agud maabot eagi ro eskuwelahan.

Sa tiempo kara, isaea ka adlaw, owa it klase, mainueanon ro tiempo ag hambae nga may bagyo. Agahon, nagpangeaba si Rowena, nag-agto imaw sa bomba nga may kapin sa 40 metros ro kaeayuon sa anda nga panimaeay.

Oras eon it tigbaeanlaw ag nakabatyag imaw it kakueba pero owa man nana pag-usisa, sa pihak hay nagpadayon sa pageaba. Samtang nagabanlaw si Rowena, sa indi kaeayuan hay may kaeanasan kung siin nagabaktas ro ana nga tiyo nga si Sente. Ag sa ana nga pagpamilapil sa mga kaeanasan, gulpi imaw nakibot nga may umagi nga lenti. Pagkapan-o nana mayad eang ag nakakuob imaw sa ubos it pilapil.

Dayon nakaabot ro lenti sa daeanon paagto sa bomba kung siin nagapangeaba si Rowena. May limang dupa sa nalikod nga bahin ni Rowena hay may isaeang ka puno it bule nga ginahambae may pila eon ka anyos ag tama eon kataas. Sa parte it daeanon nga paagto sa bomba nga ginaeabhan ni Rowena hay may mabahoe nga puno it mangga nga ro mga gamot hay nagabukoe sa daeanon. Ngani, imaw ro kabangdanan nga nagtaeang ro lenti ag dumeritso sa bule maeapit sa bomba.

Bag-o sumaka ro lenti sa bule hay nagkaykay anay imaw sa puno it bule. Pinak-os na’ ro mga dahun-dahon nga maagyan nga nagakaeapyot sa puno mawron nga nagkaeaapok ro mga raya. Owa imaw nakaabot sa tuyong it nasambit nga puno mawron nga nalagbong imaw ag nagdiretso sa puno it niyog.

Madasig ro tanan. Mangin si Rowena hay owa nakapan-o nga nag-agi eon sa ana nga kilid ro lenti. Pilang eak-ang halin sa ana nga puwesto hay sumaka ro kuring nga lenti sa sangka niyog ag idto imaw eumupok. Sa pihak kara, malinaw nga nakit-an ni Rowena ro pag-agi it lenti hasta sa ana nga pageupok kara. Napun-an imaw it tuman nga kahadlok ag kakueba. Nag-abot ro tiyo na’ Senti ag ginsugid ro tanan.

Sa pihak pa, nabatian man nanday Rude ag Mila ro mabaskog nga eupok nga sa anda nga pagkahisayod hay idto gid sa lugar kung siin ro anda nga unga. Bangud sa pagkabaeaka, dali-dali sanda nga nanaog sa bukid pabuslog kun siin ro bomba, ag hilibion nga nakit-an ro anda nga unga. Napaeuha man sanda tag  makit-an imaw. Sa pihak it tanan, nangin mapinangamuyuon sandang tatlo sa Mahae nga Makaako sa pagsalbar kay Rowena.

Nagapati sanda nga ro Santo Anghel ni Rowena ro nagsalbar kana sa kataeagman.

Pilang dag-on eunman ro nagtaliwan tag natabu raya. Makaron hay may pamilya eon si Rowena. Nakapangasawa imaw it pulis ag nagatrabaho eon bilang maestra sa elementarya sa anda nga lugar. Sa gihapon, indi na’ malipatan raya—indi mapatihan apang natabu.

Dugang nga Kaaeam:

Do lenti base sa mga panaysayon hay kaeayo nga mala-kuring ro itsura. Madasig raya magdaeagan. Ginapatihan it mga magueang nga ro bangkil nga nahaaywan sa lugar kung siin raya nageupok hay may anting-anting nga daea sa makabuoe.