Euha

Ginsalin pa-Akeanon ni Darwin Tapayan

Halin sa tulang “Luha” ni Rufino Alejandro

Tueo ro a’ng euha… tueo a’ng euha, sa gabiing madueom

Sa imong pagtueo, ianod mo eang ro akong ginadumdom,

Hugasi ro tagipusuon—tagipusuong puno’t kumkom,

Agod mag-ugan-ugan ro ginapas-an nga libong tieis-on!

Kat’ ako hay kadyot pa ag bag-o namukead rayang isipan

Maybilin si Inay ag si Itay bag-o ako hay naaywan:

“Noy, pagdahan eang sa pagpanaw sa dean it kabuganaan

Do ika’y maagto sa kaeainan hay dapat gid talikdan.”

Katong ako hay mabahoe, do akon nga isip hay nagpakpak

Sa kabuhi, do tuon ni Inay ag ni Itay hay ginsug-ak;

Sa mabaeod nga kabuhi’y isaeahanon nga nagasagwad,

Inaywan sa pampang ro kumkom nga baeon para sa ang dameag.

Nagpautwas sa rayang baso nga may hilo it kalipayan

Nga raya nga ulihi eon hay nakilaea sa kaduemanan

Abi ro magpakabuguna makaron hay dapat pasidunggan

Isaeang “bahala” ro sa paeaabuto’y pagatindugan.

Nganing makaron sa kagueangon ko hay owa it inaywan

Kundi nga pamaeandungan ro nahimong kasaeanan;

Ako’y tumangis sa sarili nga eubungan it kabuangan

Ieuha rayang akong paead nga inabot it kaduemanan.

Tueo a’ng euha… tumueo ka makaron ag imong hugasan

Tagipusuong nagpasimpaead sa eawod it kalipayan

Ianod ro pait nga tuga it inabot kong kabuangan

Agod rayang kaeainan ag sakit ko’y mag-ugan-ugan.

PUEONG IT KABUHI:

“Owa it una nga pagnueo. Daya permi sa sukdoe.”