Paghigugma sa Agahon

Ginahaead sa mga adlaw it mga tagipusuon….

Paghigugma sa Agahon

Ginbinaeaybay ni DarwinTapayan

Tinawo: Nonoy ag Inday

Takna: Agahon

Kahimtangan: Sa baeay ni Inday

Nonoy:       

O Inday nga ano katahom

Kaangay mo’y masadya nga agahon,I

kaw nga ginamhan it kagab-ihon,

Ikaw nga hinusto ag daeamguhon.

Inday:      

 Ay Nonoy, husto nga panugid

Apang agahon ko’y di maipaanggid;

Sa hinusto mong ako’y madagit

Kapara’s mo ngani’y duksoe nga pispis.

Nonoy:         

O Inday, hinusto ko nga kimo’y ipahanungod

Sa tagipusuon ko’y ikaw ro sueod;

Abi, bukwaa, dayon hambaeon kung matauod

Nga kung raya baea hay kimo nahanungod.

Inday:        

O Nonoy, kaangay mo ngani’y eapsag

Pagbuot ko’y ‘di mo maeubad;

Dinamgo ko nga ro bueak hay nagbukeas,

Ag ikaw tambubuyog, sa teamnan ko’y mageupad!

Nonoy:        

O Inday, hinusto ko’y imong pamatian

Limog ko nga may ano katantanan;

Sa agahon nga masadya’g matawhay

Kimo’y may hinusto ako nga ipangabay.

Inday:        

Ay Nonoy, agahon ko’y nagapanghakoe

Sa mga mabug-at nga pamisaeang imong ginsuoe;

Kaangay mo’y tambubuyog sa akong taeamnan

Nga indi ko hinustong imong suoran.

Nonoy:

 Ay abaw Inday! Anay kag magtawhay

Tagipusuon ko’y kimo ro pagdayaw;

Kaparas sa masadya nga pagbutlak it adlaw

Kaangay mo nga tuman ag eabaw.

Inday:        

Tan-awa Nonoy, pispis nga gaeupad

Abi-abiha kung siin magapanagad:

Kaparas mo nga duksoe ag eubag

Nagpamisaeag sa agahon ko’y nagsamad.

Nonoy:        

Matabo ag hinusto O akong Inday

Apang sa gihapon, sa pageupad ko’y matinawhay

Ag sa pageupad ko’y puno ro usoy

Sa mahinusto’t panganod ag hanging maeangoy.

Inday:        

Natab’an! O Nonoy, ngani ipahusto

Do dayunon nimong gintuyo

Sa kakon ikaw hay magpaeapit

Apang angay nga sa kakon, ika’y magpananglit.

Nonoy:        

Mahinusto Inday, ikaw akong ginahigugma

Sa tagipusuon ko’y ikaw ro pamisaea

Ngani imong pamatian limog kong matinantanan

May hatod kalipay nga tuman.

Inday:        

Ipahanungod kakon, O Nonoy sa pagkamadali

 Iya ako agod nga sa kimo’y magpamati;

Agahon ko’y pun-a it kasadya

Ag ipahanungod kakon ro hantop nimong paghigugma.

Ambahanon ni Nonoy

(Nagasaot si Inday)

Nonoy: (Makanay nga maninut-anon)

I.      

O Inday nga hinigugma nakonSa imong kaangay ag katahom         

Kaparas mo’y masadya nga agahon       

Kapara’s moy adlaw sa nasidlangan        

Nagbutlak nga may ano katantanan        

Ngani imong pakatan-awon, mapuea nga panganod it agahon.        

(Madasig nga masinadya)

II.     

Sa bukid nga atong gin’pangumunanMatawhay nga eawod hay makit-an        

Batyagon ro hanging eab-as        

Tan-awon ta, mabinuganang bueak        

Ag alibangbang nga ano kasadya,        

Mga pispis nga nagaeupa-euparan nga manaya        

Ngani’y O Inday       

Kita’y mamasyar kunta.

Ambahanon nanday Nonoy ag Inday

(Nagasaot samtang nagakanta)

Nonoy/Inday: (Masinadyahon)

Koro:

O atong paghigugma

Kaangay nga eangitnon

Kapara’y agahon nga eab-as

Sa tagipusuon ta nga mahiniyas

O ipahanungod hinigugmang o ano katantanan

Himaya it agahon, aton gid nga handuman

Sa pagtapos it adlaw sa kabukiran

Atong pakadumdumon, atong pahanungdan

Sa matawhay ag mainangay nga agahon

Eab-as ag matam-is ro paghigugma naton.

Ambahanon ni Inday

Inday: (Makanay nga mabinut-anan)

III.     

O Nonoy nga hinigugma nakon

Kapar’as mo ma’y masadyanga agahon

Kapar’as it adlaw sa nasidlangan

Nagbuteak nga may ano kagamhanan

Ngani’y atong pakadumdumon

Masadyang panamgo it kagab-ihon.

(Madasig nga masinadya)

IV.   

Sa bukid nga akon nahimtangan

Matawhay nga eawod hay makit-an

Batyagon ro hanging eam-is

Samitan ta, tubi sa sapa nga matinam-is

Tan-awon katamnan nga may nabiling euha

Sa nagligad nga gabii it kabugnaw ag agda

Ngani Nonoy kita’y mamasyar ‘unta!

(Ibalik sa Koro)

Nonoy:

Inday saeamat sa pagbaton,

Ikaw gid lang ro akon nga pagahigugmaon.

Inday:

Ginahigugma ko ikaw nga dayon.

Nonoy ag Inday:

Tubtob sa kamatayon!

TAPOS

Setyembre 8, 2008