AKLANON PROUD

ni Darwin Tapayan Sa tunga it katueugon Masadya nga panamgo ro nangin dayon: Kabuhi nga eangitnon Kalipay nga owa it utbong. Ginbaktas mabato nga daeanon Paagto sa bukid nga may katayugon; Gintikeod ro bato nga nagapangatubangon Sa mahaba kong daeanon. Naabot gid ro punta it bukid Sa manami nga taeamnan naniid; Nangaon prutas  nga manamit O ano kananam, o kabuhi matam-is! O ano kanami nga panamgo— Pangabuhi nga imaw gid ro handom ko; Sa pagdayon it mga paniempo Makita ko gid ro kamatuoran it rayang panamgo.

ni Darwin Tapayan Panamgo, handom ag eupad Kaparas it pispis nga nagapasimpaead Nga sa kahawaan ag sa panganod nagaantad Ag sa kaeawuron hay nagapanagwad. Mapaeangit, mapaeugta ukon mapaeawod Eupad nga matuod indi basta mahawod Mahimakasan, suba man ukon bantod Sa eawod, nagahampang sa baeod. Do eupad nga hilway ag makanay Sa ulihi, tuman ro kalipay Ag sa eugta’y magabalik daea ro katawhay, Agud ulikdon ro kabuhing kato’y ahaw. Daya akong paandam: “Magdahan eang sa pageupad Basi kong ikaw hay hinandad Ag hilipat sa ginpanaad— Kabuganaan nga kanday Nanay ag Tatay hay gintagtag.”

ni Darwin Tapayan Owa man siguro it maeain karon Alinon ko t-a nahagustuhan ko ron; Indi eang kamo mahangawa kakon Kung nagatangda sa kaeangiton. “Tan-awa baea si Makaruyon Nasamad ro ueo eon karon; Sa sobrang pag-inambisyon Owa ma’t nahimuan ron!” Maeain kung mag-inambisyon Kung ‘di maghugod, ‘wa’t paeaabuton; Makaro’y nag-abot eon ro dag-on Maeapit eon lang ag makatapos it pagtuon. Napangutana ko: ako gid baea ra? Bisan abong kalisod, sige eang a Maabo man ra a’ng kapareha— Mga ambisyoso, ambisyosa. Itanom ko gid sa a’ng isip ron— Maabot ko gid ro a’ng mga ginahandom Sa ulihi nga mga dinag-on Makita n’yo eon ro husto nga si Makaruyon.